PEÑA SEMPRE PAHIÑO

 

                                                              SEMPRE PAHIÑO

 A Acta Fundacional da peña é do 07 de Agosto do ano 2012. É dicir, somos unha peña relativamente nova, oito anos recén cumpridos, pero a idea da mesma xa levaba tempo arroutando polos nosos miolos. Foron os malos momentos deportivos durante o tránsito do equipo pola segunda división o que fixo que un grupo de siareiros de diferentes zonas ( Santa Cristina de Lavadores, O Troncal na Travesía de Vigo e o Picoto en Chapela-Redondela ) que coincidiamos na bancada de Marcador decidíramos darlle un pulo á nosa afección polo Celta, artellando esta Peña Celtista o cal visualizaría moito máis o noso amor polo clube e a través do cal poderíamos ter unha participación máis activa nos eidos do celtismo.

Non somos un gran grupo, hoxe en día somos ó redor de 60 peñistas. A nosa sede, tras diferentes cambios, está no barrio de Vilar, en Lavadores, no Bar Mosquera, que é a zona a onde pertencemos a maioría dos Pahíñ@s, que é coma nos gusta ser chamados.

Non é moi normal que unha Peña, relativamente xove, cunha media de edad sobre os 40 anos, teña o nome dun xogador dos anos 40 e 50. O nome de Sempre Pahíño débese a que Manuel Fernández Pahíño, é unha figura que concorda coa nosa forma de entender o fútbol e a vida:

Xogador de CANTEIRA ( San Paio de Navia )

Único Pichichi vigués en 1ª División xogando no Celta.

Home contestatario e Iconoclasta. Enfrentouse ó propio clube cando sentiu que non o trataban como debían. O faría máis tarde ante o propio Santiago Bernabéu, na súa etapa no Real Madrid. En pleno Franquismo, repúxose ó seu xeito,ó réxime establecido, o que lle privou, sendo o mellor goleador da época, de xogar o Mundial  de 1950 coa Selección Española.Lector de Tolstoi e Dostoievski en plena Dictadura.

Acabou xogando no Deportivo da Coruña.

           Os Pahíñ@s, identificámonos co apoio a canteira, darlle valor á xente da casa. Gústanos a identificación de Celta e Galeguismo, xa que pensamos que éste está enraizado no orixe do clube. Non somos forofos. Se cremos que o clube non vai na dirección axeitada non teremos reparos en dicilo públicamente. Non todo é valido ( Por exemplo, non nos gusta que casas de Apostas Deportivas sexan publicitadas polo Celta). Os cartos non o son todo. Por outro lado, demostrou que se pode xogar no Celta e no Deportivo (Non foi o único). Para nós o Depor é o noso máximo rival, pero nunca debe convertirse no noso enemigo. O futbol o entendemos como diversión, cultura e deporte. O fútbol nunca debe ser sinónimo de violencia. O fútbol debe unir, nunca separar.

           Daniel Fernández , neto de Pahíño, madrileño, é o noso socio de honra. Tamén temos relación cun dos seus fillos, Nacho Goberna, coñecido por pertencer a un dos grupos da Movida dos 80, La Dama se Esconde. Sempre nos apoiaron na nosa iniciativa de darll-lo nome do seu pai á nosa Peña.

          Outro socio de honra, xa falecido, foi David Reboredo, ex-toxicómano vigués que provocou un movemento social polo seu Indulto e o cal apoiamos, levando á súa reivindicación ás bancadas de Balaídos  e máis aló.

          Tamén foi socio de honra da Peña, tristemente tamén falecido, José Manuel Roldán, máis coñecido coma Pepín ou Pucho. Hincha singular, moi coñecido en Marcador e sobre todo en Barreiro, Recentemente foi o terceiro aniversario do seu pasamento.

         Pero non todo van ser malas noticias. Os Pahíñ@s sentímonos moi orgullosos da creación da canción Aspas' On Fire e de poder compartila con toda a familia Celeste:

ORGULLO DE MOAÑA

NO CELTA TI ES FELIZ.

GALICIA CALIDADE

TI ES XA PARTE DE MIN

E METE UN GOL

FORZA IAGO METE UN GOL

QUE IMOS GAÑAR

AFOUTEZA E CORAZÓN

ASPAS' ON FIRE

FAI TREMER Ó SEU RIVAL

ASPAS' ON FIRE

O PARTIDO IMOS GAÑAR.

           Contamos con varios músicos na Peña, Gaiteiros, etc, o cal axuda xa que entendemos o fútbol coma un acto social, coma unha festa, sexa gañando, perdendo, en primeira ou en segunda división. Sempre Pahíño. Sempre Celta.